Вечерва на зајдисонце започнува светиот месец Рамазан, а муслиманите кај нас традиционално подготвуваат алва во пресрет на месецот Мубарак.

Алва е ориентален десерт, кој потекнува од Блискиот Исток. Како деликатес најраспространет е во арапските земји и на Балканот. Името доаѓа од арапскиот збор „халва“, што значи благо.

Во Македонија денеска традиционално се подготвува алва по повод ноќта на Мубарак и во пресрет на муслиманските празници, како и по повод Рамазан.

Алвата е слатко јадење направено од брашно, масти или шеќер и од сусам или други адитиви.

Состојки:

– 100 гр. путер или маргарин

– 100 гр. брашно

– 100 гр. шеќер

– 200мл. вода

– 1 ванилин шеќер

– ореви или кокос за декорација

Подготовка:

Првата работа што треба да ја направите е да стопите 100 грама путер и да оставите путерот целосно да се растопи. Потоа додадете 100 грама брашно. Мешајте ја смесата постојано 10 минути, внимавајќи да не изгори алвата.

Во друго тенџере ставете 200 милилитри вода и 100 грама шеќер и додадете една кесичка ванилин шеќер. Потоа зовријте ја водата и шеќерот и додадете ги во смесата од путерот и брашното. По неколку секунди, почнете да ја мешате смесата за да не се формираат грутки.

Кога алвата е готова, оставете ја да се излади неколку минути, а потоа обликувајте ја со лажица. На крај украсете ги парчињата алва со ситно сечкани ореви или кокос.

Извор:Точка