Надал го „пецна“ Ѓоковиќ со изјава во врска со поддршката од публиката

Рафаел Надал го доби четвртфиналето против Новак Ѓоковиќ и остана во игра за нов трофеј на Ролан Гарос. Шпанскиот ас имаше подобра вечер од ривалот, а доби и помош од публиката, која ја користеше секоја прилика да му помогне со максимална поддршка.

Токму на тоа се пожали српскиот ас, кој често не е голем миленик на фановите. Тоа се потврди уште еднаш на овогодишниот турнир во Париз, кога доби и свирежи од дел од навивачите при излегувањето на теренот. Неколку дена по дуелот Надал зборуваше за тениските приврзаници и љубовта која ја ужива кај нив, а кажа и зборови кои медиумите ги протолкуваа како мала провокација кон Србинот.

„Правам што можам за да бидам пример. Кога некој ќе ја добие наклонетоста и поддршката од публиката, задоволството е големо. Затоа што тоа значи дека не само што добро сте ги направиле работите удирајќи го топчето на теренот, туку и некои други работи надвор од него. Тоа се убави моменти и значат уште повеќе кога сте во поодминати години и при крајот на кариерата“, рече тенисерот од Мајорка.

Рекордерот по бројот на титули во француската престолнина започна одлично и без проблеми го доби првиот сет. Потоа испушти два брејка во вториот сет и му дозволи на Ѓоковиќ да се врати во игра. Меѓутоа кога се чинеше дека моментот е на страна на првиот носител, Надал започна да го игра најдобриот тенис и зачекори кон полуфиналниот меч против Александер Зверев.