Турција испраќа бродови за трагање по нафта и гас, грчката војска во готовност

Турција најави испраќање на бродови за трагање по полиња со нафта и гас во спорно подрачје од Средоземното море, со што се зголемија тензиите со соседна Грција, но и Европската унија која ја повика Анкара да се откаже од таа идеја.

Како што соопштија властите од Атина, грчката армија е во состојба на готовност поради најновиот развој на ситуацијата. Турските власти соопштија дека истражувачкиот брод „Орук Реис“ и два помошни бродови ќе „трагаат“ до 2-ри август јужно од грчките острови Родос, Карпатос и Кастелоризо.

„Турција ја зголеми агресивноста кон Грција, Кипар и Европската унија“, изјави грчкиот премиер Киријакос Мицотакис.

Иако се земји сојузнички од НАТО Алијансата, Грција и Турција се во конфликт околу правата на експлоатација на гас и нафта во регионот. Сепак, Турција се соочува со проблем поради фактот што Европската унија, но и САД се поостро ги критикуваат властите од Анкара поради намерата за проширување на истражувањето на територија која Грција ја смета за своја.

Германскиот министер за надворешни работи, Хајко Мас кој е во посета на Атина, ја повика Турција да ги избегне „провокативните акции“ и да се вклучи во преговорите со Европската унија.

„Имаме многу јасен став – меѓународното право мора да се почитува. Поради тоа, напредок во односите со Турција може да се постигне само доколку Анкара ги избегнува провокациите на источниот Медитеран“, изјави Мас.