Во Германија, најголем пораст на бројот на заразени од јануари досега

 Во Германија, најголем пораст на бројот на заразени од јануари досега

Потврдени се 29.426 нови случаи на инфекција со коронавирус во Германија, најголемо дневно зголемување од 8 јануари, додека владата сака да воведе поостри мерки за спречување на третиот бран на епидемијата.

Починати се 293 лица, а од почетокот на пандемијата 79.381.

Седумдневниот просечен број на нови инфекции на 100.000 жители се искачи на 160.1, според податоците на Институтот за инфективни болести Роберт Кох.

Германија се бори со варијанта на коронавирус која брзо се шири, пет месеци пред парламентарните избори на кои се очекува помала поддршка за владејачките конзервативци на Ангела Меркел отколку на минатите избори.

Канцеларката Меркел сака парламентот привремено да ѝ одобри на сојузната влада можност за воведување блокада во области со голем број на заразени лица, бидејќи некои региони не сакаат да воведат построги ограничувања.

Вицеканцеларот Олаф Шолц во четвртокот ги бранеше измените на Законот за заштита од болести, кои вклучуваат воведување полициски час кога седумдневната инциденца го надминува бројот на сто случаи на 100.000 жители.

„Ова помогна насекаде, тоа е направено во многу земји ширум светот – и ја намали стапката на инциденца“, рече тој за телевизијата АРД, додавајќи дека треба да се преземе нешто за да се ограничи ширењето на вирусот.

„Сакаме да имаме строги правила“, рече тој.

>
>