Трамп одреди нов рок за договор за мир во Украина

Додека Украина се подготвува за тешка зима, на хоризонтот постои закана што многумина ја сметаат за многу поопасна, а тоа е брзањето американскиот претседател Доналд Трамп.
Европските лидери започнаа итна дипломатска контраофанзива за да го спречат Трамп да и наметне на Украина брз мировен договор, кој би одел во прилог на Русија.
Загриженоста што се шири низ Берлин, Париз и другите европски престолнини се сведува на едноставна пресметка: брзината во овој случај би можела да значи предавање.
„Ова не е дипломатија со рок – тоа е предност за Кремљ“, изјави за „Киев пост“ западен функционер запознаен со ставот на Европа, додавајќи: „Русите го разбираат политичкиот часовник на американскиот претседател подобро од кој било друг“.
Постојат стравувања дека Кремљ го искористува притисокот на Трамп за брза победа во надворешната политика пред да влезе во втората година на функцијата, при што претседателот наводно приватно сигнализирал дека сака да го реши проблемот пред Нова Година.
Европските лидери ќе се состанат во Берлин на почетокот од следната недела за да се договорат за нивната преговарачка стратегија. Дали делегацијата на Трамп ќе се придружи на состанокот останува неизвесно. Според американските и европските претставници, тоа зависи целосно од напредокот во разговорите оваа недела меѓу групата Е3 и Украина за територијални и безбедносни прашања.