Полска пресретнала руски авион над Балтикот, воздушниот простор бил нарушен од Белорусија

Полска испрати борбени авиони да пресретнат руски извидувачки авион кој летал во близина на нејзиниот воздушен простор над Балтичкото Море и соопшти дека десетици објекти пристигнале од Белорусија преку ноќ.
„Утрово, над меѓународните води на Балтичкото Море, полски борбени авиони пресретнаа, визуелно идентификуваа и испратија надвор од нивната зона на одговорност руски извидувачки авион кој леташе близу до границите на полскиот воздушен простор“, соопшти полската војска во четврток.
Земјите на источното крило на НАТО се во состојба на зголемена готовност за можни упади во воздушниот простор од септември, кога три руски воени авиони го нарушија естонскиот воздушен простор, неколку дена откако околу дваесетина руски беспилотни летала влегоа во полскиот воздушен простор.
Полската канцеларија за национална безбедност објави дека неколку десетици објекти влегле во полскиот воздушен простор од белоруска страна, од кои четири биле идентификувани како веројатни балони за шверц.
„Огромниот број на нарушувања на полскиот воздушен простор, нивното појавување за време на празничната сезона, проценката на активноста на руските авиони во Балтичкото Море и фактот дека слични инциденти неодамна се случија во Литванија, може да укажуваат дека станува збор за провокација прикриена како шверцерска операција“, се наведува во соопштението за медиумите.
Фото: Архива