Нобеловиот институт ја отфрла идејата наградата за мир да му се префрли на Трамп

Норвешкиот Нобелов институт објави дека Нобеловата награда за мир не може да се пренесе на друго лице, по изјавата на лидерката на венецуелската опозиција Марија Корина Мачадо, која сугерираше дека може да ја донира својата Нобелова награда за 2025 година на американскиот претседател Доналд Трамп.
Во своето соопштение, Институтот нагласува дека одлуката за доделување на Нобеловата награда е конечна и непроменлива, повикувајќи се на статутот на Нобеловата фондација, кој не дозволува жалби или измени.
„Откако ќе биде доделена, Нобеловата награда не може да се повлече, подели или пренесе на други. Одлуката е конечна и важечка за сите времиња“, соопшти Норвешкиот Нобелов комитет.
Мачадо претходно изјави за „Фокс њуз“ дека доделувањето на наградата на Трамп би било чин на благодарност од венецуелскиот народ за соборувањето на Николас Мадуро, кој беше уапсен минатата недела од американските сили и префрлен во САД.