Кина и САД започнаа нови трговски преговори

Кина и САД денес започнаа нови трговски разговори во Куала Лумпур, во обид да најдат решение за царинската војна меѓу двете најголеми економии во светот.
АФП од лице место објави дека кинескиот потпретседател Хе Лифенг пристигнал во кулата Мердека 118, вториот највисок облакодер во светот, каде што се одржуваат разговорите.
Американската делегација пристигнала низ посебен влез, подалеку од видното поле на камерите.
„Кинеската и американската делегација се состанаа утрово за да разговараат за економски и трговски прашања“, објави кинеската новинска агенција Синхуа, потврдувајќи го почетокот на разговорите.
Неименуван портпарол на Министерството за финансии на САД, исто така, го потврди почетокот на разговорите.
Малезија е домаќин на самитот на Здружението на земјите од Југоисточна Азија (АСЕАН), кој започнува утре во Куала Лумпур, а на состанокот ќе присуствува и американскиот претседател Доналд Трамп, кој синоќа замина на азиска турнеја.
За време на посетата на Азија, се очекува американскиот претседател да се сретне со својот кинески колега Си Џинпинг во четврток со цел да склучи трговски договор со Пекинг.
Средбата е закажана на маргините на самитот на Азиско-пацифичката економска соработка (АПЕК), кој ќе се одржи во јужнокорејскиот град Гјеонгџу, почнувајќи од 31 октомври.
Двете најголеми економии во светот се заглавени во трговска војна откако Доналд Трамп се врати во Белата куќа во јануари.
Серија претходни разговори во Женева, Лондон, Стокхолм и Мадрид досега ги спречија двете сили да ги спроведат своите закани за казнени тарифи.
Нивното трговско примирје истекува на 10 ноември.