Над 900 жртви во поплавите во Индонезија

Индонезија се справува со последиците од масовните лизгања на земјиштето и ненадејните поплави предизвикани од циклонот на островот Суматра минатата недела, при што бројот на жртви во неделата надмина 900.
Големи површини со обработливо земјиште, брани и станбени згради се оштетени и ќе треба да се обноват, изјави претседателот Прабово Субианто за време на посетата на Ачех, една од трите провинции погодени од катастрофата.
Шефот на Националната агенција за управување со катастрофи (BNBPB), Сухарјанто, изјави дека бројот на жртви се искачил на 921, со 392 исчезнати лица и 975.000 раселени.
Од погодените провинции, Ачех, Северна Суматра и Западна Суматра, Ачех беше најтешко погоден, со 366 загинати, рече Сухарјанто. Стотици села и две погодени области во Ачех остануваат отсечени бидејќи патиштата се сериозно оштетени. BNPB соопшти дека ќе бидат потребни околу 51,82 трилиони рупии (2,66 милијарди евра) за обнова на оштетените куќи и јавни згради во трите провинции.
Националната влада досега не сакаше да прогласи национална катастрофа, а Прабово ги увери жителите дека неговата администрација има доволно средства за покривање на трошоците за реконструкција. Раселените жители се изложени на ризик од заразни цревни заболувања, респираторни инфекции и кожни заболувања, додека има недостиг од здравствени работници.
„Ни требаат околу 600 лекари најмалку во следните три месеци кои ќе бидат стационирани во изолирани и оддалечени области“, рече министерот за здравство Буди Гунади Садикин.