Врховниот суд на Крим осуди граѓанин на Санкт Петербург на шест години затвор, откако беше прогласен за виновен за предавство затоа што се обидел да преплива од Крим до Одеса и да се приклучи на украинската војска, соопшти прес-службата на судот.
Според наводите од обвинителството, 40-годишниот маж од Санкт Петербург се спротивставил на рускиот напад на Украина, па одлучил да замине во Украина за да учествува во воените дејствија на страната на Вооружените сили на Украина, пренесува РИА Новости.
За да го стори тоа, обвинетиот преку Интернет контактирал со претставници на украинската доброволна воена единица, која регрутира Руси и го организира нивното заминување во Украина.
Неговиот прв обид да ја премине државната граница преку Брјанскиот регион бил неуспешен. Потоа му било понудено да стигне до Украина по морски пат преку Крим. За да го спроведе овој план, осуденикот купил костум за нуркање, пераи, компас, подводна батериска лампа и торби од водоотпорна ткаенина.
Во август минатата година тој пристигнал на Крим, а потоа тргнал да го преплива Црното Море во правец на Одеса. Тој бил откриен од руски пограничен брод на 8 август во близина на селото Оленевка на Крим и тогаш бил уапсен.
Судот ги оквалификува дејствијата на обвинетиот како подготовка за велепредавство и нелегално преминување на границата на Руската Федерација. (МИА)
Ultrasoft