По повод една година од преземањето на функцијата, градоначалникот на Струга се обрати пред јавноста, презентирајќи ги резултатите од досегашното работење на локалната самоуправа. Во своето обраќање тој се осврна на финансиската состојба, инфраструктурните инвестиции, урбанизмот и активностите насочени кон подобрување на животот на граѓаните.
Според градоначалникот, новото општинско раководство пред една година презело институција со сериозни финансиски предизвици и наследени обврски од над 11 милиони евра.
Тој истакна дека наместо да бара оправдувања за затекнатата состојба, неговиот тим се определил за финансиска дисциплина, одговорно управување и контрола на јавните расходи.
Исплатени над 2 милиони евра наследени обврски
Како еден од најзначајните резултати, градоначалникот го посочи намалувањето на наследените финансиски обврски.
Според презентираните податоци, во периодот од јануари до 2 ноември биле исплатени над 2 милиони евра наследени долгови.
Истовремено, наплатата на даноците се зголемила од околу 27 на приближно 70 проценти, што според градоначалникот претставува показател за подобреното функционирање на општинската администрација.
Тој соопшти и дека Општина Струга за првпат остварила поврат на ДДВ во износ од околу 600.000 евра.
Намалени непотребните трошоци во Општината
Во обраќањето беше нагласено дека локалната самоуправа презела мерки за намалување на трошоците.
Трошоците за репрезентација на градоначалникот, кои претходно изнесувале околу 3.000 евра месечно, според неговите зборови, биле целосно укинати.
Дополнително, службеното возило „Ауди“ било продадено, а бројот на службени телефонски линии бил намален од 95 на 55.
Градоначалникот порача дека секој трошок на Општината мора да биде оправдан и во интерес на граѓаните.
Инфраструктурни проекти во Струга и населените места
Значаен дел од обраќањето беше посветен на инфраструктурните активности што се реализираат со поддршка на Владата и централните институции.
Како еден од најважните проекти беше издвоен Источниот колектор, за кој градоначалникот посочи дека е постигнат значителен напредок.
Меѓу проектите што се во напредна фаза на реализација ги наведе замената на азбестните водоводни цевки, работите на Булевар Туристичка, патниот правец АС Камп – Сатеска, канализацијата во Враништа, пречистителниот колектор во Радожда, како и чистењето на одводните канали.
Градоначалникот упати благодарност до Владата, премиерот и надлежните министерства за поддршката при реализацијата на проектите.
Над 2.000 наследени предмети за легализација
Во областа на урбанизмот, градоначалникот посочи дека биле затекнати над 2.000 барања за легализација кои со години чекале на разгледување.
Според неговиот отчет, во изминатата година биле завршени околу 150 предмети за легализација, додека биле обработени над 300 барања за одобренија за градење.
Тој нагласи дека со интензивирање на работата на комисиите и теренските активности се настојува да се забрза решавањето на предметите и да се подобрат услугите за граѓаните.
Околу 250 средби, активности и настани
Покрај финансиските и инфраструктурните активности, градоначалникот се осврна и на јавниот, културниот и спортскиот живот во Струга.
Според презентираните информации, во текот на годината биле реализирани околу 250 средби, активности и настани.
Тој истакна дека Општината продолжува да ги поддржува културните и спортските манифестации, младинските иницијативи и активностите од социјален карактер.
„Ред. Работа. Резултати.“
На крајот од своето обраќање, градоначалникот истакна дека е свесен оти за една година не можат да се решат сите проблеми што се создавале со децении.
Сепак, тој оцени дека во изминатиот период биле поставени нови темели за поодговорно, поефикасно и потранспарентно функционирање на локалната самоуправа.
„Денес не стојам пред вас за да кажам дека сме решиле сè. Би било погрешно да тврдам дека една година е доволна за решавање на проблемите што се создавале со децении“, порача градоначалникот.
Тој нагласи дека постигнатите резултати му даваат дополнителна мотивација да продолжи со истата посветеност и одговорност кон граѓаните.
„Ред. Работа. Резултати. Ова е нашиот начин на работа и ова останува наша обврска“, порача градоначалникот на Струга.
