Претседателката на Европската комисија, Урсула фон дер Лејен, денеска ја започнува посетата на регионот на Црното Море, во услови на зголемени безбедносни закани по серијата напади врз трговски бродови во близина на Романија и Бугарија.
Во објава на социјалните мрежи, Фон дер Лејен порача дека нападите стануваат сè почести и дека веќе има и човечки жртви. Таа најави средби со лидерите на Романија и Бугарија, на кои ќе се разговара за состојбата на теренот и за можностите Европа да го засили својот одговор.
„Слободата на пловидба во Црното Море мора да биде обновена и зачувана“, истакна претседателката на Европската комисија.
Пред почетокот на посетата, Фон дер Лејен телефонски разговарала со украинскиот претседател Володимир Зеленски. Таа повторно ја поддржала неговата иницијатива за прекин на огнот што би ја опфатил критичната инфраструктура за снабдување со храна и енергија.
Во разговорот биле разгледани и актуелните мировни напори, како и разговорите што оваа недела треба да се одржат во Абу Даби, на кои, според Фон дер Лејен, Европската Унија ќе учествува заедно со своите партнери. Таа најави и средба со Зеленски во Даблин подоцна неделава, каде што со други европски лидери ќе разговара за следните чекори кон постигнување мир.
Според најавениот распоред, Фон дер Лејен денеска ќе престојува во Букурешт, каде што ќе се сретне со романскиот претседател Никушор Дан и премиерот Лука Никулеску. Утре ќе отпатува во бугарскиот град Варна, каде што е предвидена средба со премиерот Румен Радев.
Посетата доаѓа по серијата напади со беспилотни летала врз трговски бродови во Црното Море во октомври. Од 5 до 28 октомври биле погодени или потонале најмалку девет товарни бродови во близина на романскиот и бугарскиот брег. Во инцидентите имаше и загинати, исчезнати и повредени членови на екипажите.
Извор: TV21 — Свет
