24-годишниот маж со екстремно десничарски ставови, кој уби шест лица и рани уште 15 во вооружен напад на градскиот плоштад во Краков, Полска, починал во болница во понеделникот, соопшти полицијата.
Напаѓачот, облечен во воена облека и со панцир, влезе со возило на главниот плоштад во стариот дел на Краков, каде што отвори оган. Станува збор за една од главните туристички атракции во вториот по големина град во Полска, а меѓу загинатите и повредените имаше и странски државјани.
Полицијата соопшти дека мажот, чиј идентитет сè уште не е официјално објавен, продолжил да пука дури и откако бил ранет од полициските службеници. Од нападот бил во критична состојба и повеќепати бил опериран. Надлежните соопштија дека починал во болницата во 4:30 часот наутро.
„Пред сè, истражуваме дали бил инспириран од некого и дали некој му помогнал“, изјави за Асошиејтед прес Ерик Стасиелак од краковската канцеларија на Националното обвинителство.
Тој додаде дека истражителите ги заплениле електронските уреди на напаѓачот и ќе се обидат да пристапат до нивната содржина.
Стасиелак рече дека обвинителството истражува и како напаѓачот успеал да набави толку голем број оружје и муниција. Според него, сè уште е рано да се коментира неговата идеологија, а истрагата се движи во неколку правци. Обдукциите на жртвите започнаа денеска.
Во нападот загинаа четири жени и двајца мажи. Три од жените и еден од мажите биле полски државјани, додека меѓу загинатите имало и маж од Велика Британија и жена од Австрија.
Властите утрово соопштија дека сите повредени се во стабилна состојба. Полицаецот кој на крајот го запрел напаѓачот и понатаму е во тешка здравствена состојба.
Извор: TV21 — Свет
