Тешка железничка несреќа го потресе Египет. Најмалку седум лица загинаа, а 112 се повредени во судир на два патнички воза што се случи во неделата во провинцијата Гиза, јужно од главниот град Каиро, според најновите информации.
Несреќата се случила во областа Ал-Ајат, кога патнички воз што сообраќал на релацијата Гиза – Фајум удрил во задниот дел на друг воз, кој патувал од Каиро кон Асуан.
Од силниот удар, неколку вагони излетале од шините, а дел од патниците останале заробени во оштетените композиции.
На местото на трагедијата веднаш пристигнале бројни спасувачки екипи, амбулантни возила и технички служби. Повредените биле пренесени во околните болници, каде што им е укажана медицинска помош.
Египетскиот претседател Абдел Фатах ал-Сиси наредил итна истрага за причините за несреќата, со барање сите за кои ќе се утврди одговорност поради невнимание или пропусти да бидат санкционирани.
Надлежните служби работат на отстранување на оштетените вагони и повторно воспоставување на железничкиот сообраќај. Причината за судирот сè уште се истражува.
Извор: TV21 — Свет
