Во првите девет месеци од оваа година, САД управувале со повеќе од 12 милијарди долари приходи од продажбата на венецуелска нафта, се наведува во извештајот на ревизорската компанија КПМГ, објавен од американскиот Стејт департмент. Овој систем за управување со приходите беше воспоставен откако администрацијата на американскиот претседател Доналд Трамп во јануари го уапси тогашниот претседател на Венецуела, Николас Мадуро.
Според извештајот, купувачите на венецуелска нафта и други природни ресурси ги уплаќале парите на сметка на американското Министерство за финансии. Потоа, средствата биле префрлани на привремената влада на Венецуела, предводена од поранешни сојузници на Мадуро, кои сега тесно соработуваат со Вашингтон.
Извештајот е датиран на 29 октомври и бил доставен до Конгресот на почетокот на ноември, соопштил претставник на американскиот Стејт департмент.
„Извештајот покажува дека системот функционира“, изјавил анонимен претставник за весникот Њујорк тајмс.
Тој додал дека приходите од нафтата и другите природни ресурси на Венецуела, во првите девет месеци од годината, биле искористени за финансирање на основните јавни услуги, одржување на макроекономската стабилност и обновување на клучните сектори, како енергетиката, здравството и инфраструктурата.
Според извештајот, најголемиот дел од средствата уплатени на сметката, во износ од над 12,1 милијарди долари, потекнуваат од продажбата на нафта, други нафтени деривати и природен гас. Помали суми се остварени од продажбата на злато (108 милиони долари), минерали (22 милиони долари) и хемиски ѓубрива (24,6 милиони долари).
„Средствата остануваат суверена сопственост на Венецуела“, се наведува во извештајот, но тие се чуваат до донесувањето одлука од американскиот државен секретар Марко Рубио за нивно користење за јавни, државни или дипломатски цели.
Од вкупниот износ на уплати од 12,11 милијарди долари, биле исплатени 99 проценти од средствата.
Извор: TV21 — Свет
