Тешка сообраќајна несреќа се случи во неделата наутро, 8 ноември, на автопатот А3 во Хрватска, кога автобус со српски регистарски таблички се преврте во близина на Иваниќ-Град. Во несреќата животот го загубија две лица, додека 33 патници се повредени.
Според информациите објавени од хрватските медиуми, несреќата се случила околу 7:25 часот, на автопатот во правец кон Загреб, непосредно по клучката Иваниќ-Град.
Хрватското Министерство за надворешни работи потврдило дека загинатите се државјани на Хрватска и Црна Гора, односно дека ниту една од двете жртви нема српско државјанство.
Оваа информација претходно ја соопшти и привремената отправничка на работи во Амбасадата на Србија во Хрватска, Дејана Перуничиќ, која ги посети повредените српски државјани сместени во загрепските болници.
Шест лица се тешко повредени
Според информациите од хрватските здравствени власти, шест лица се здобиле со тешки телесни повреди, додека 27 патници поминале со полесни повреди.
Повредените биле транспортирани во повеќе здравствени установи во Загреб, каде што им била укажана медицинска помош.
Дел од патниците со полесни повреди веќе се пуштени на домашно лекување. Од болницата за трауматологија во Загреб потврдиле дека осуммина повредени, кои биле примени со полесни повреди, се отпуштени.
Реакции од Хрватска и Србија
Хрватскиот премиер Андреј Пленковиќ телефонски разговарал со српскиот премиер Ѓуро Мацут, при што двајцата изразиле жалење за трагичната загуба на човечки животи.
Српскиот премиер упатил благодарност до хрватските надлежни служби за брзата интервенција и помошта што им била пружена на повредените патници.
Од Амбасадата на Србија соопштиле дека се во контакт со здравствените установи и дека продолжуваат да ги информираат семејствата на повредените.
Надлежните институции ги утврдуваат околностите под кои дошло до превртувањето на автобусот.
Извор: Hina / Dnevnik.hr / Tanjug
