Цените на сите нафтени деривати бележат значително намалување откако Регулаторната комисија за енергетика донесе одлука за поевтинување во просек за 7,51 процент во однос на цените утврдени на 2 ноември.
Бензините Еуросупер БС-95 и БС-98 поевтинуваат за седум денари по литар. Новата цена на 95-ката ќе изнесува 86 денари, а на 98-ката 88 денари за литар.
Дизелот ќе биде поевтин за 5,5 денари и ќе се продава по 94,5 денари за литар. Екстралесното масло за домаќинство поевтинува за 6,5 денари, на 103,5 денари за литар, додека цената на мазутот се намалува за 6,26 денари по килограм и ќе изнесува 49,31 денар.
Одлуката е донесена поради падот на берзанските цени на нафтените деривати и понискиот курс на доларот, но и како резултат на владините мерки за намалување на акцизите. Акцизата за бензините е намалена за два денара, а за дизелот за четири денари по литар. Дополнително, за дизелот се применува и намалена стапка на ДДВ од 10 проценти.
